رباعيات كتبتها تأثرا بكتاباته
عجبى يابن ادم فرعنك ايه
عشان طلعت الفضا؟ طب وفيها ايه
مانت اخرك برضه شوية تراب تدور
على مكان ف بطن الارض تتدارى فيه
(2)
عكاز محبة وقلبى عليه انسند
وكان للكره ما كان ..من فعل الهدد
اد ايه اتحملنى...كام مرة اتحملته
يااااااه دانا نسيت من كتر العدد
(3)
ورقة شجر من جناح الخريف داست عليها القدم
يا هلترى مين يصدق ان لها صرخة الم
ياما ناس وناس تيجي وترحل ف الدنيا
ما يدرى بيها او يحزن عليها غير سكون العدم
(4)
حدايتى يا حدايتى يا محدفة الكتاكيت
ياللى بقالك ف الامثال شنة وصيت
ازاى .....وانا الاديب الالمعى
ما تيجى سيرتى حتى ف الحواديت
(5)
قلت ارسم سرحت قلمى شخبط شخابيط
خطوط بتخانق خطوط واهى كلها تخابيط
قالولى بيع قلت فين؟...سوق الحمير؟!
اتارى حتى الاحساس للبيع وانا اللى كنت عبيط
(6)
جدودنا دوخوا العالم بسر التحنيط
والشئ لزوم الشئ ودة فن التخطيط
واكمننا خدنا منهم ريحة العبقرية
احنا اللى علمنا الجنيه فن التنطيط
(7)
قالولى اصبر لاجل ما يبقى فيه معنى للعمل
واستعنت ع الصبر بالحلم عشان لا احس بالملل
وقلت اعيش ع الامل لكين الاكادة
ان اليأس راخر طلع عنده امل
(8)
طلع النهار كتب التاريخ ع السبورة
قال حرفين درسنا ف غنوة عصفورة
"ب" ويا "ح" قبل الرحيل اشبكوهم
واما ييجى الاوان راح تبان الصورة
(9)
ف يوم صحيت لقيت الكون ف الضباب غارق
والنور لابس توب الحيا كأنو سارق
وناس بتشكى وناس بتبكى ع اللى بيشكى
سألت ليل دة والا نهار؟ ردوا قالوا ايه الفارق
(10)
صبية حلوة قالت يا مين يعلمنى العوم
عرق الشهامة نقح على سادة القوم
نده عجوز بصوت مبحوح"يامين يعدينى"
فجأة......كبس عليهم سلطان النوم
(11)
قال مين علمك يا ربيع فن الزواق
قال طبع فيه دة مش نفاق
طب ايه يخللى الحياه لها معنى
قال انى اعيش ف قلوب العشاق
(12)
انا ايه؟...انا كل شئ؟.......انا اى شئ؟
انا شئ من شئ والا شئ من لا شئ
مليون سنة وسؤالى يتيم مالة جواب
انا ف الاصل شئ واللا لا شئ؟
(13)
طريق الحياه اطول م الايام والسنين
والخلق فيه ياما رايحين وجايين
انا واحد منهم والا حصوة بتنداس
ف طريق فيه ناس تانيين ماشيين
(14)
الدنيا قالت ارمى بياضك يا عريس
جريولها العشاق بالغالى والنفيس
كانت تبكيهم ويفتكروها بتضحك لهم
مين اللى قاللكم تامنولى يا متاعيس
12/11/2004