صرخة من قلب الحجر

جانى مرسالك يا صبية
حط ف ساعة مغربية
على شباكى وبكى
وقالى قتلوا البنية
قلبى عليكي يا صبية انفطر
لما دماكى سالت ع الحجر
قتلوا البسمة فوق شفايفك
ولم يرحموا حلمك يا صبية
دبحوكى اة يا بنيتى
لاجل يعيشوا وتموت القضية
بكت قلوبنا العاصية عشانك
وملاها الالم ايمان وطهارة
وهربت م العيون دموع اخواتك
وصبحت فوق الخدود حجارة
حالفة لتاخد بالتار
تهزم حبروت النار
ولا يروح دمك هدر
اضرب....اضرب يا حجر
عينى اة يا عينى ع الولد
قتلوه ف حضن ابوه
ساكته ليه متفوقى يا بلد
دا تاركم.حتسيبوة؟
قتلوا العدل ف حضن الحرية
ديابة تحت ستار المدنية...........متخفية
قتلوا البراءة ف حضن السلام
داسوا على كل الاحلام.......بوحشية
بالقوة اتاخد حقنا
بالقوة لازم يرجعلنا
مش بالوعود
مع مين؟
مع ناس لا بتوفى
ولا تحفظ عهود؟
بقى دا اسمه كلام؟
كفاية بقى
كفاية انهزام
هو الدم اللى راح وانهدر
ممكن يعيدوا الكلام يا بشر؟؟؟
كفاية كتر كلام
كفاية استسلام
يا الف مليون عربى
من المحيط للخليج
بتصرخ دموع قلبى
مين يطفى الحريق
لحد امتى
حتبات ف ضلمتها عقولنا
ونرضى الهوان
لحد امتى
حتفضل ف غفلتها قلوبنا
لاخر الزمان؟
فين راحت النخوة والشهامة
مين يصون العزة والكرامة
لما تسألنى اقولك
كان زمان وجبر
واتحسر ع اللى كان
يا الف خسارة يا بشر
دا حتى الحجر
بقاله قلب انسان

القاهرة فى
2/2/2001